ვანის მუნიციპალიტეტის სოფელ ჭყვიშში გალაკტიონ ტაბიძის 127 წლის იუბილესადმი მიძღვნილი საზეიმო ღონისძიებები გაიმართა.
დილიდან გალაკტიონის მშობლიურ სოფელ ჭყვიშში სტუმართა ნაკადი არ შეწყვეტილა.
სახლ-მუზეუმს სტუმრობდნენ სტუდენტები, სკოლის მოსწავლეები, პედაგოგები, კულტურის და ხელოვნების სხვადასხვა სფეროს წარმომადგენლები.
პოეტის საიუბილეო ღონისძიებებს საქართველოს რეგიონული განვითარების და ინფრასტრუქტურის მინისტრი მაია ცქიტიშვილი ,იმერეთის გუბერნატორის მოადგილე ბესიკ გოფოძე ,ვანის მუნიციპალიტეტის მერი ალექსანდრე გოგორიშვილი,ვანისა და ბაღდათის მიტროპოლიტი მეუფე ანტონი, ადგილობრივი ხელისუფლების წარმომადგენლები და საზოგადოების სხვა წევრები დაესწრნენ.
გვირგვინით შეამკეს პოეტის ძეგლი, ვანის მუნიციპალიტეტის მერმა და მოწვეულმა სტუმრებმა.
გალაკტიონობის აღნიშვნა სახლ-მუზეუმის ეზოში გაგრძელდა სადაც გაიმართა საზეიმო კონცერტი ადგილობრივი შემოქმედებითი ჯგუფების მონაწილეობით.
სცენიდან მიულოცა საზოგადოებას გალაკტიონის 127-ე იუბილე ვანის მუნიციპალიტეტის მერმა ალექსანდრე გოგორიშვილმა.
„გილოცავთ გალაკტიონობას! თითოეული ჩვენგანისთვის განსაკუთრებით საამაყოა დღეს ამ ადგილას ყოფნა, რადგან სწორედ აქ დაიბადა ყველა დროის საუკეთესო პოეტი, პოეზიის მეფედ წოდებული გალაკტიონი! „
სცენიდან მიულოცა ასევე შეკრებილ საზოგადოებას გალაკტიონის 127-ე იუბილე საქართველოს რეგიონული განვითარების და ინფრასტრუქტურის მინისტრმა მაია ცქიტიშვილმა და გალაკტიონის შემოქმედების სიდიადესა და მნიშვნელობაზე ისაუბრა.
წელს ჭყვიშში ა(ა)იპ ვანის ტურიზმის ცენტრის მიერ პირველად იქნა წარმოდგენილი ტურისტული ექსპოზიცია შემოდგომის თემაზე.
დღეს გალაკტიონის სახლ-მუზეუმში მოსულ სტუმრებს საშუალება ქონდათ თავად ამოევლოთ ჩურჩხელა და დაეგემოვნებინათ ადგილობრივი კოოპერატივების ნაწარმი.
მოგვიანებით გალაკტიონის 127-ე საიუბილეო თარიღთან დაკავშირებით, საპატიო ვანელების დაჯილდოების ცერემონიალი გაიმართა.
ვანის მუნიციპალიტეტის განვითარებაში შეტანილი წვლილისთვის და სხვადასხვა სფეროში ვანის სახელის წარმოჩინებისთვის საპატიო ვანელის წოდება მიენიჭათ:
1.მერაბ ერემეიშვილს- ექიმი ქირურგი, პროფესორი-იმერეთის სამხარეო კლინიკური საავადმყოფოს ქირურგიული დეპარტამენტის ხელმძღვანელი.
2. ჯაჯალა სანიკიანს -დამსახურებული პედაგოგი.
3. ჯონი შანიძეს- ტექნიკურ მეცნიერებათა დოქტორი, აკადემიკოსი.
4. მამუკა შარაშენიძეს-ბიზნესმენი.
5. ამირან ადეიშვილს-ბიზნესმენი.
გალაკტიონ ტაბიძის შემოქმედება რამდენიმე ათეული წელია გადაულახავ მწვერვალად დგას თანამედროვე ქართულ პოეზიაში, მისი ლექსები თარგმნილია მსოფლიოს ხალხთა მრავალ ენაზე. მთელს საქართველოს ეამაყება გალაკტიონი, განსაკუთრებით კი ვანელებს.
გვეამაყება, რომ ვანის მიწაზე დაიბადა ყველა დროის საუკეთესო პოეტი, პოეზიის მეფედ წოდებული გალაკტიონი.
