” ტიციანობა 2019 “

ვანის მუნიციპალიტეტში ტიციან ტაბიძის დაბადებიდან 124 წლისადმი მიძღვნილი საიუბილეო ღონისძიება გაიმართა.
„ტიციანობასთან“ დაკავშირებით გამართულ ღონისძიებას იმერეთში სახელმწიფო რწმუნებულის პირველი მოადგილე ზვიად შალამბერიძე, ვანის მუნიციპალიტეტის მერი ალექსანდრე გოგორიშვილი, ტიციან ტაბიძის შვილისშვილი გივი ანდრიაძე, ხელისუფლების წარმომადგენლები და საზოგადოების სხვა წევრები დაესწრნენ.
დილიდან ხელისუფლების წარმომადგენლებმა, მოწვეულ სტუმრებთან ერთად ტიციან ტაბიძის ბიუსტი მიხაკებით შეამკეს.
მოგვიანებით კი პოეტის მშობლიურ სოფელ ჭყვიშში, ა(ა)იპ კულტურული ღონისძიებების ორგანიზების და მართვის ცენტრის ორგანიზებით , ლევან გერსამიას სახელობის ვანის კულტურის ცენტრის შემოქმედებითი კოლექტივების მიერ წარმოდგენილი იქნა ლიტერატურულ – მუსიკალური პერფორმანსი „მე დავიბადე აპრილის თვეში“.
ტიციან ტაბიძე დაიბადა ჭყვიშში, 1895 წლის 2 აპრილს.
„ 1905 წლიდან სწავლობდა ქუთაისის კლასიკურ გიმნაზიაში. მისი ნოველები, მინიატურები და ლექსები უკვე 1911 წლიდან იბეჭდებოდა “კოლხიდაში”, “სახალხო გაზეთში”, “ერში”, “თეატრი და ცხოვრებაში”. 1911 წლიდან სწავლობდა მოსკოვის უნივერსიტეტის ფილოლოგიის ფაკულტეტზე. იყო ერთ-ერთი დამაარსებელი, ხელმძღვანელი და თეორეტიკოსი “ცისფერყანწელთა” სიმბოლისტური ორდენისა, ავტორი ცნობილი წერილისა — “ცისფერი ყანწებით”. რედაქტორობდა გაზეთ “ბარიკადს”. ლირიკულ ლექსებთან ერთად წერდა პოემებს, მინიატურებს, წერილებს, ესეებს, ლიტერატურულ ნარკვევებს, თარგმნიდა სხვადასხვა ქვეყნის პოეტთა ნაწარმოებებს. ტაბიძეს ეკუთვნის თარგმანები ფრანგული და რუსული ენებიდან. მან თარგმნა ა. პუშკინის, ი. ბუნინის, ვ. მაიაკოვსკის, ლ. არაგონისა და სხვათა თხზულებები. 1935 წელს მოსკოვში გამოიცა მისი პოეტური კრებული რუსულ ენაზე.
ტიციანის ლექსები თარგმნილია ფრანგულ, ინგლისურ, პოლონურ, იტალიურ და სხვა ენებზე. 1937 წელს ანტისაბჭოთა მოღვაწეობის ბრალდებით დააპატიმრეს და დახვრიტეს.“