დღეს ვანში გალაკტიონ ტაბიძის 125 წლის იუბილე აღინიშნა.
უამინდობის მიუხედავად, დილიდან გალაკტიონის მშობლიურ სოფელ ჭყვიშში საქართველოს სხვადასხვა კუთხიდან ჩამოსულ სტუმართა ნაკადი არ შეწყვეტილა.
სახლ-მუზეუმს სტუმრობდნენ სტუდენტები,სკოლის მოსწავლეები,პედაგოგები, კულტურის და ხელოვნების სხვადასხვა სფეროს წარმომადგენლები.
ღონისძიებათა ციკლი ჭყვიშში, გალაკტიონ ტაბიძის სახლ-მუზეუმში დაიწყო სადაც გამგებელმა ზაზა ხურციძემ მოწვეულ სტუმრებთან და ადგილობრივი ხელისუფლების წარმომადგენლებთან ერთად გალაკტიონ ტაბიძის ძეგლი გვირგვინით შეამკო.
125-ე საიუბილეო თარიღთან დაკავშირებით გალაკტიონ ტაბიძის შემოქმედების შესახებ ლიტერატურული პერფორმანსი გაიმართა პოეტის მშობლიურ ქოხში,რომელმაც მაყურებელზე დიდი შთაბეჭდილება მოახდინა.
დღის ბოლოს კი ლევან გერსამიას სახელობის ვანის კულტურის ცენტრში რომა რცხილაძის და მისი ბენდის კონცერტი გაიმართა ,რომელსაც ვანისა და ბაღდათის ეპარქიის მიტროპოლიტი მეუფე ანტონი,ვანის მუნიციპალიტეტის გამგებელი ზაზა ხურციძე,მოწვეული სტუმრები და საზოგადოების სხვა წევრები დაესწრნენ.
კონცერტზე წარმოდგენილი იყო მაყურებლისთვის კარგად ნაცნობი და საყვარელი სიმღერები რომა და თემო რცხილაძის რეპერტუარიდან.
სცენაზე გალაკტიონ ტაბიძის ლექსზე „ვერხვები“, სპეციალურად დღევანდელი დღისთვის შექმნილმა, სიმღერის ახალმა ვერსიამაც გაიჟღერა.
კულტურის ცენტრის სცენაზე წარმოდგენილმა ღონისძიებამ მაყურებლის დიდი მოწონება დაიმსახურა.
ვანელებისთვის ძალზედ საამაყოა ის ფაქტი,რომ ასეთი ბუმბერაზი პოეტი,პოეზიის მეფედ წოდებული გალაკტიონი ვანის მიწაზე დაიბადა. დაუსრულებლად შეიძლება საუბარი „მიუწვდომელ და მარადიულ“ გალაკტიონზე, მისი პოეზია განაგრძობს არსებობას და მას დავიწყება არ უწერია!
