დღეს ვანის მუნიციპალიტეტის გამგებელი ზაზა ხურციძე საკუთარ კაბინეტში ორგანიზაცია “სტუდენტები თვითმმართველობისათვის” წარმომადგენლებს შეხვდა.
სტუდენტებმა გამგებელთან შეხვედრისას იმსჯელეს ვანის მუნიციპალიტეტის ტურისტული და ინფრასტრუქტურული განვითარების გზებზე და მოქალაქეთა ჩართულობაზე ადგილობრივი თვითმმართველობის განხორციელების პროცესში.
კონკურსი”სტუდენტები თვითმმართველობისათვის” წელს უკვე მესამედ იმართება. პირველად, მსურველთა რეგისტრაცია 2014 წლის ოქტომბერში გამოცხადდა და მასში საქართველოს ყველა საუნივერსიტეტო ქალაქი ჩაერთო. საბოლოოდ კი 10 გამარჯვებული გუნდი გამოვლინდა.
აღნიშნულ პროექტს ორგანიზებას უწევს ა/ო “მოქალაქე” (mokalake.ge) და შეფასებისა და გამოცდების ეროვნული ცენტრი (naec.ge)
პროექტის მიზანია:
*ადგილობრივი ახალგაზრდების გააქტიურება და რეგიონებში „სამოქალაქო ლიდერების” ფორმირების პროცესის ხელშეწყობა, რეალური თვითმმართველობის განხორციელების მხარდაჭერა .
*ახალგაზრდების ჩართვა სამოქალაქო საზოგადოების განვითარების პროცესში, ადგილობრივი დემოკრატიის გაძლიერება, ახალგაზრდებში თვითმმართველობის იდეის პოპულარიზაცია.
*საზოგადოებრივ პროცესებში სტუდენტების თანამონაწილეობის მნიშვნელობის გაზრდა და მოქალაქეობრივი მოვალეობებისა თუ როლის გაცნობიერების ხელშეწყობა.
*თვითმმართველობის საკითხებში ახალგაზრდა პროფესიონალების მომზადებისა და ჩართულობის ხელშეწყობით ადგილობრივი თვითმმართველობის განვითარების მხარდაჭერა.
პროექტის , “სტუდენტები თვითმმართველობისათვის” ფარგლებში სამოქმედო არეალი ვანის მუნიციპალიტეტის ტერიტორია იქნება, შესაბამისად მკაცრი მოთხოვნაა, რომ გუნდის წევრობის კანდიდატები რეგისტრირებულნი იყვნენ ამავე მუნიციპალიტეტში, ხოლო ფაქტობრივად ცხოვრობდნენ სოფელ სალხინოში.
გარდა ამისა, წარმატებული გუნდებისათვის ორგანიზაცია “მოქალაქე” სასწავლო ტურს მოაწყობს განვითარებული თვითმმართველობის მქონე რომელიმე ევროპულ ქვეყანაში.
შეხვედრის დასასრულს ვანის მუნიციპალიტეტის გამგებელმა ზაზა ხურციძემ მადლობა გადაუხადა სტუდენტებს სტუმრობისთვის და გამოთქვა მზაობა მათ მხარდასაჭერად პროექტის განხორციელების პროცესში
