სოფლის მხარდაჭერის პროგრამის ფარგლებში მოსახლეობასთან შეხვედრები გრძელდება.
დღეს, ვანის მუნიციპალიტეტის მერის პირველი მოადგილე გოჩა ჭუბაბრია, ადგილობრივი ხელისუფლების წევრებთან ერთად, პრიორიტეტული პროექტების დაგეგმვის მიზნით, მთისძირის, ზეინდრის, გორას, ფერეთას, სალომინაოს და უხუთის ადმინისტრაციული ერთეულის მოსახლეობას შეხვდა.
ადგილობრივების გადაწყვეტილებით, მთისძირში, სტურუების უბანში შეიღობება სტადიონი, ჭაგან ჭყვიშში კი რეაბილიტაცია ჩაუტარდება სასაფლაოსთან მისასვლელ გზას და კეთილმოეწყობა საზოგადოებრივი თავშეყრის ადგილი.
სალომინაოს მაცხოვრებლებმა, ერთხმად დაუჭირეს მხარი, საბავშვო ბაღისა და ამბულატორიის მიმდებარე ტერიტორიაზე ბეტონის გზის დაგებას.
საერთო ჯამში სალომინაოსა და ბაგინეთში მცხოვრები მოსახლეობისთვის მნიშვნელოვან პროექტებად დასახელდა, შიდა საუბო გზების შეკეთება, სასმელი წყლის მილების შეძენა და გარე განათების მოწყობა.
ზეინდარსა და შუა გორაში, მოსახლეობის მოთხოვნით მოეწყობა გარე განათება.
ფერეთას ადმინისტრაციულ ერთეულში, ადგილობრივების გადაწყვეტილებით, კეთილმოეწყობა ცენტრალური სკვერი, ბაბოთში კი რეაბილიტირდება შიდა საუბნო გზები.
ქვედა გორაში მოსახლეობამ მხარი დაუჭირა სოფლის ცენტრის კეთილმოწყობას, რაც შეეხება ზედა გორას, აქ ადგილობრივებმა ბუხაიძეების უბნის საავტომობილო გზაზე, ბეტონის საფარის მოწყობა მიიჩნიეს პრიორიტეტულად.
უხუთის ადმინისტრაციული ერთეულის მაცხოვრებლებმა, საბავშვო ბაღისთვის ატრაქციონების შეძენას და სასმელი წყლით უზრუნველყოფის მიზნით, პოლიეთილენის მილების შეძენას დაუჭირა მხარი, იმერ უხუთში კი მოსახლეობისთვის პრიორიტეტულად მიჩნეული იქნა საუბნო გზების შეკეთება, სასმელი წყლის რეზერვუარისა და პოლიეთილენის მილების შეძენა.
სოფლის მხარდაჭერის პროგრამის ფარგლებში მოსახლეობასთან შეხვედრები მთელი კვირის მანძილზე გაგრძელდება და მოიცავს ვანის მუნიციპალიტეტის ყველა სოფელს.
შეხვერდების დროისა და ადგილის შესახებ მოსახლეობას წინასწარ ეცნობება მერის წარმომადგენლების მიერ შესაბამის ადმინისტრაციულ ერთეულებში.
#სოფლისმხარდაჭერა2023
